السلام عليكم
هاذي أول تدوينة لي بمدونتي البسيطة
ماحبيت تكون أول تدوينة لي عن الميكب قد ما حبيت انها تكون تعريفية بمدونتي و بنفسي
بداياتي بعالم المكياج و ال beauty عموما كانت في صيف 2011
وقتها جاني فديو عن بنوتة باليوتيوب تسوي ميكب و اعجبني جدا و الي خلاني اتحمس طريقتها كانت ولا ابسط و الادوات الي استعملتها متوفرة و اسعارها مناسبة غير ان عمرها كان مابين 16 - 17
هالشي حفز عندي الحب الموجود من الصغر
اتذكر و انا عمري 8 سنين كانت كل العابي عرايس و مكياج ..
و على بدايات ال 13 و 14 سنة بديت اشتري ارواج
و لما وصل عمري 17 كان كل مكياجي عبارة عن كحل و مسكرة و روج وبلشر لا اكثر ولا اقل
وبالمناسبات اضيف بودرة ..
ما كان عندنا بمجتمعنا ذاك الاهتمام بالميكب و الفاشن
و المحلات كانوا البائعين تسويقين لا اكثر
مع تطور التكنولوجيا و الثورة المعلوماتية
صارت الناس تفتح يوتيوب و تتعلم
تفتح مدونات و تتعلم
و مع الانستقرام و تويتر و كل هالمواقع تفتحت عقول الناس
و صارت تدور و تسأل قبل ما تشتري شي
من هذا المنطلق حبيت أفيد و أستفيد عبر انشاء مدونة انشر فيها كل خبراتي بهالمجال
طبعا أنا كل الي تعلمته كان من اليوتيوب و الحمدلله لغتي ساعدتني أفهم شوي
و بدأت اشتري الي اشوف عنه مدح و أجرب
و بدأت اطبق على الي حواليني
اخواتي قريباتي و على نفسي اكيد
الحمدلله تطورت مهاراتي كثيررر و صرت اعرف لما انزل ايش احتاج و وش المنتج الكويس من البطال
بداياتي كانت كلها بال drugstore
الي هي الماركات المتوسطة الاسعار زي ريميل و برجوا و مايبيلين و غيرها ..
لما بديت اتعلم واعرف بدأت اشتري من ماركات ال highend زي ماك و بينيفت و غيرها ..
انا في طور التعلم ..
الانسان مستحيل يوقف يتعلم لأن الزمن هذا كل شي في تطور يوم بعد يوم ..
و طموحاتي ان شالله أكبر من مدونة و لكن الانسان يبدأ خطوة خطوة عشان يقدر يحقق مبتغاه
و إن شالله أفيدكم و استفيد منكم ..
وتذكروا إن الله جميل يحب الجمال #
هذي نبذة بسيطة عني ~
و بإذن الله مرتين أسبوعيا حنزل لكم هنا ~
دعواتكم بالتوفيق
