Morning makeup : المكياج الصباحي

السلام عليككم 

مافي مقدمات حدخل سيده في الموضوع p: 

المكياااج الصباااحي 

قبل ابدا في شي مره ينرفزني شخصيا 

لما اشوف وجه بنت اصفر و اشهب بالصباح و حوالين فمها ابيض و شعرها اي كلااام 

ليش ياقلبي لييش

خصوصا في الاضاءة البيضا 

احس انجلط خلااص 

سووو اذا انتي ماتحبي الميكب الصبااح اقل شي نظفي بشرتك و رطبيها ورتبي نفسك :* 

واذا بتحطي ميكب هيئي بشرتك من الليل 

احب اقشر وجهي قبل لا انام و ارطبو و ارطب شفايفي

 احب المقشرات اليوميه الخفيفه و احب كريم لايبوبيز بعدها و الترطيب بالليل احط فازلين لشفايفي 

اقوم و بشرتي زي البيبي و شفايفي ناعمه  

اذا بشرتك جافه رطبيها بمرطب خفيف كمان الصبح 

 زي مرطب غارنييه الي بمويه الورد 

نجي للميكب 

ميكب الوجه ~

البيبي كريم و السيسي كريم و التنتد موسترايزنق افضل شي للصباح لانها خفيفه و توحد لون البشره و تخفي الاحمرار و بعضها تغطي العيوب 

الفاونديشن ماحسه ينفع للصبح لان استخدامه يوميا يضر البشره كثير فالافضل تبتعدي عنه 

احب اوزع البيبي كريم بيدي واذا مره مستعجله بفرشه 

الكونسيلر استخدمي نوع خفيف اذا كان عندك هالات او حبووب و انا افضل تبع غارنييه لانه طبيعي و يغطي بشكل مقبول و احيانا احطه على كامل الوجه 

احب احط الكونسيلر بيدي اسرع و يندمج ومايخطط واططبطب عليه بالاخير 

الهايلايتر مو مهم للصباح لكن انا شخصيا احب المظهر النظر للصبح و احب استعمل الهايلايتر الكريميه لانها تندمج مع البشره و تدي شكل مو مبالغ فيه عكس الباودر هايلايتر 

البلشرر حاولي يكون لون خفيف و دافي للصبح لان مو منظر حلو يكون وجهك كلو بلشر الصبح 

البلشرات الكريميه حلوة للصباح سريعه و خفيفه وتديك لوك ناعم و كلو نضاره 

البرونز جميل للصبح لكن بشكل معقول 

بنات اشوفهم الله يهديهم وجيههم كلها برونززززز و بشكل منفر 

هنا صورة برونزرات خفيفه و صباحيه 

نجي لميكب العيون و حنزل لكم كذا طريقه بالفديو عالانستقرام 

حواجبك رتبيها و ارسميها على خفيف 

الحواجب المحدده و الغامقه منظرها مو صباحي ابدا و بيني و بينكم حتى مسائي ماحبها لووول 

زمان كانو يقولو الحواجب السودا غلط ومعرف ايش و كثير صارو يرسموها ببني بس نفس الطريقه غلط يعني مو عشان اللون اتغير الرسمه تمام 

حاولي ماتغمقيها و لو بتستعملي تاتو خذي نقطه و على يدك ادمجيها و ابداي من منتصف حاجبك 

قدام لاااا بعدين لما ينتهي اللون مشطي الي قدام و حيندمج اللون و يسير تمام و في شرح للطريقه على حسابي 

انتي حره بنوع المستحضر للحواجب سواء قلم او بودرة او جل او تاتو اهم شي طريقتك تكون بشكل خفيف مناسب للصبح 

احب استعمل الجل لتثبيت الحاجب يبرز الشعر و يدي منظر طبيعي 

الاكحال الملونه جميله للصبح لكن برضو على خفيف مايكون اللون صارخ جدا و لا باهت جدا كمان 

الكحل البيج اليم جوا العين و تحته ادمجي شدو بني او لون يطلع بيررفكت 

الاي لاينرر جميل للصبح لكن نرسم رسمه نحيفه و  قصيره مو لنهايه حاجبك و جفنك نصو اي لاينر 

احب استعمل ليكود لاينر لانه اسرع الصبح و حق نكس عاجبني ما يختفي بسرعه 

الكحل الاسود ماحبه للصبح لكن حلو على خط الرموش مو جوا العين 

المسكررررا للصباح احبها و احب اكثرها لكن مو اوفرر 

والي يركبو رموش الصباح الله على فياقتكم الله يرزقني زيهاااا يا شيخه :( 

احب هالمسكرا للصبح خفيفة وتدي كثافه معقولة 

اذا تحبي الشادوهات الصبح اختاري الوان ترابيه و مااات

العلبه هاذي من نيكس حلوة كلها مات 

الشيمر و القليتر مره مو حلوين بالصبح 

و الشدوهات الكريميه حلوة كلون واحد للجفن 

نجي للشفاايف 

اعشق الارواج المات الصبح ماعرف ليش

احسها تدي منظر نظيف 

عموما كل الارواج حلوة للصبح حتى الاحمر و العنابي لكن باعتدال 

يعني لو براسك روج احمر نفسك تحطيه حاولي يكون مناسب لك و خفيف و مات و لا تكثري ميكب عيونك اكتفي بمسكرا وكحل بيج يطلع بيررفكت و العنابي برضو نفس الشي 

بس كمان مو تعتمديه يوميا 

يكون تغيير فقط 

احب ارواج نيكس المات و ويت اند وايلد ماتنشف الشفايف مره و تثبت مع الاكل و الشرب 

ارواج مكياجي انا حلوة كريميه خفيفه بس الالوان الغامقه تطلع برا الشفايف و غير ثابته 

اما ارواج صبايا كويسه و ثباتها كويس 

ارواج ريميل كيت موس بنوعيها الحمرا و السودا حلوة للصباح و في درجات حلوة حنزلها عالانستقرام 

الليب بتر من ريفلون كيوت للصبح بس الثبات و لا نقطه 

احب كمان المحددات لحالها و عليها مرطب او تحتها مرطب للصبح بالوان نيود يدي لووك مرتب 

و ان شالله حبيتو البوست و استفدتو و انتظرو التطبيق في الليل 

 

تجربتي مع التسوق الالكتروني : My experience with online shopping

السلام عليكم 

التسوق الالكتروني صار منتشر هالفترة جدا و السبب انه يوفر عليك جهد و يوفر منتجات غير متوفره عندنا و احيانا يوفر عليك فلوووسك و تجيبينها بسعر اقل من المتوفر بالاسواق

هذا البوست بيكون عن تجربتي بالتسوق الالكتروني و كل الي اعرفه و بامكانه يساعدكم

اول شي انا حابه اوضح اني اقصد بالتسوق الالكتروني الي هو الطلب من المواقع اون لاين 

 في انواع للتسوق الالكتروني انك تشترين من تجار يعرضون بضاعتهم في مواقع التواصل الاجتماعي زي الانستقرام و تويتر و في الطلب مباشره من الموقع الي تبينه سواء عربي او اجنبي و فيه الشراء عن طريق وسيط اما شخص او موقع وسيط 

ادري بتفلسف بس ماعرف اشرح الا كذا استحملوني 

اول طلبيه لي كانت من موقع ماركة vip 

طبعا هو موقع عربي يشحن عالبيت عن طريق ارامكس و الدفع عنده خيارات كثير 

انا طلبت بلوزتين و الدفع اخترته عند الاستلام 

طبعا في رسوم شحن ١٩ ريال و رسوم انو الدفع عند الاستلام برضو ١٩ ريال 

طبعا هالكلام السنه الماضيه فما اعرف ايش سياستهم الان

التوصيل اخذ شهرر و كم يوم مره وقت طويل الصراحه 

و وصلت البلايز و مقاساتها تمام و زي الصور 

و طلبت منهم بعد كم شهر من الطلبيه الاولى نظارة شمسيه و وصلت بعد اسبوعين بس 

بس بعد فتره قريت عن الموقع انو يجيب تقليد و كذا فما رجعت طلبت منه مع انو النظاره جا معاها كرت الماركة و باين انها اصليه لكن الله اعلم  

عالعموم قررت ابدأ اطلب من مواقع اجنبيه 

بس ما كنت افهم شي و لا اعرف شي عن الطلب اون لاين 

فلجأت لموقع اسمه اطلبلي 

الموقع عباره عن وسيط بينك و بين الموقع الي بتطلبين منه

مجرد تحطين روابط طلباتك الي تبينها من المواقع الي تبينها و بياناتك و بس  

حطيت الروابط و كانت من موقع درق ستور و بيوتي و امازون 

هالموقع عباره عن موقعين سوا و لكن تطلبين منهم و كانهم موقع واحد درق ستور منتجات رخيصه نوع ما و بيوتي للهاي اند و كذا و الموقع متنوع حتكلم عنه تحت 

ردو علي بعد يوم بانو البائع الي بامازون مو موثوق 

و هالشي حبيته فيهم لاني ماكنت افهم بهالامور 

 

المهم حطولي التكلفه بالاضافه لعمولتهم الي هي ٥ بالميه من طلباتي و تكلفه الشحن

و انصدمت من تكلفه الشحن

 تكلفه الشحن ٧٠٠ و شوي 

يعني ماحسيت ان طلباتي تكلف هالمبلغ

خصوصا انو بعض الاشياء الي طلبتها تكنسلت و ما طلبوها لي 

تواصلت معاهم و نزلولي المبلغ صار ٥٠٠ و شوي 

مشيت حالي و دفعتها

حولتلهم المبلغ تبع الاغراض و بعد اسبوعين و شوي ردو بانها وصلت المستودعات حقتهم و كذا 

 

و وصلني الطلب

 

كان عباره عن فرش ريل تكنيك لي و لاختي و لصقات كريست لاختي و ارواج وت اند وايلد يمكن ٦ ارواج و اكحال نيكد علبتين و فير ريفلون و من ايلف برونز و بلشر و نيكد البلشر و البرونز بس وصلني بعدها باسبوع لحاله 

طبعا ما تعاملت معه الموقع ثاني لان حسيت انضحك علي بالمبالغ حقت الشحن

و قررت اترك الكسل 

و اقرا و اثقف نفسي من ناحيه الطلب اون لاين 

و لقيت موقع اسمه البوابه الرقميه و فيه مواضيع بالهبل

قريت و قريت 

لما بعد كم شهر

حسيت اني مستوعبه الفكره 

طبعا اول شي تعلمته ان يكون عندك بريد امريكي عشان يسهل عليك الطلب و وقع اختياري على شركه ماي يو اس 

حسيتها افضل شركه 

و فتحت حساب بريميوم فيها و اشتركت فيها لمده سنه بمبلغ ٣٠٠ ريال 

الدفع عن طريق فيزا الراجحي 

و قررت اطلب من درق ستور انا و قريباتي 

و لما تممت طلبيتي و جا وقت الدفع قلي انو ما يقبلون الفيزا السعوديه 

مع انو المبلغ انسحب من الفيزا 

راسلتهم ان المبلغ انسحب ردو علي انو انسحب من البنك و هم ما استلمو شي 

و دقيت عالبنك و رجعو المبلغ 

و وقتها اتحطممممت 

جربت عن طريق الباي بال برضو مايقبلو لانه سعودي 

حسيت بقهر 

رجعت لموقع البوابه الرقميه اقرا 

لقيت قسم اسمو الوساطه الالكترونيه 

اتواصلت هناك مع وسطاء يطلبولك بعموله بسيطه ما تتعدا ٦٠ ريال 

و طلبت يكون الشحن على بريدي لكن الوسيط لخبط و حطه على بريده فقلت يالله مو مشكله 

حسابي كان ٢٠٠٠ تقريبا و الشحن حول ال٣٠٠ 

وهاذي صورة طلباتي 

فرررق طبعا عن موقع اطلبلي لان هنا طلباتي اكثر بكثير من هناك

و لاني كنت جاهله حبتين و ماقريت سياسه الموقع  في الدفع و الشحن غلطت هالغلطة :/

و اخر شي طلبتو كان لصحبتي من موقع موسكينو شنطة الدفع فيزا الراجحي و الشحن على البريد الامريكي 

واتعلمت شغله جديده بس ماجربتها حجربها قريب 

انو نفس بريدي الامريكي يقدر يطلبلي من المواقع الي ماتقبل فيزتي و انا ادفع لبريدي بس اتعلم على الشغله و اجربها اخبركم :)

و بالنسبه لموقع drugstore 

هالموقع عشقييييي 

يجنن يجنن يجنن

احس فيه كل شي ابيه 

اقسامه متنوعه في الميكب و عنايه الشعر و الجسم و الوجه و فيه اشياء صحيه و للرجيم و فيتامينات و فيه ادوات و اجهزة للشعر و غيرو و غيرو 3> 

و بيوتي زيه بس للهاي اند براند يعني ماركات مثل بينفت و لوراك و هيك :)

و كلهم تطلبين منهم ببنفس السله يعني كنهم موقع واحد $_$

بس عيبهم ما يقبلون الفيزا السعوديه 

و قريت تجارب بعض الناس ان يقبلون فيزتهم بس حقتي ماقبلها 3\> 

اي سؤال انا حاضرة حبايبي 

و نصيحه مني ادخلو و اقروا بالمواقع و تجارب الناس و في كتاب اسمه التسوق الالكتروني للبنى السلطان يمدحونه و حشتريه قريب و اخبركم عنه اكثر 

و اشوفكم ببوست ثاني كلامه اقل من كذا p:

لصقات كريست لتبييض الاسنان : crest 3D white whitestrips

السلام عليكم جميلاتي

من زمان عن المدونة و ماعطيتها حقها و من اليوم و رايح رح تنزل تدوينات فيها اسبوعيا باذن الله

نجي لتدوينه اليوم و هي عن لصقات كريست لتبييض الاسنان

كثر الكلام حول اللصقات ذي و مدى فاعليتها و اضرارها و الخ

قررت اكتب تجربتي معها بعد مرور حوالي ٨ شهور على استخدامي لها تقريبا

اول شي انا حقتي طلبتها من امازون و سعرها حول ال ١٥٠ ريال مو متذكره غير طبعا تكاليف الشحن لاني طلبت اشياء معها 

اول شي اللصقات تجي انواع 

في للاسنان الحساسه و في العاديه 

و قواتها تختلف

في الي تقعد خمس دقايق و في الي تقعد ساعتين 

المهم انا قررت على اقوى نوع 

الحمدلله اسناني موب حساسه لكن كانت صفرا جدا

نوع حقتي intensive professional 

مدتها ساعتين 

وجات جوتها ٧ لصقات بكل وحده ثنتين وحده للي فوق وحده للي تحت

طريقتها تفرشين بعدين تقعدين ربع ساعه عالاقل و تحطينها مو مباشره بعد الفرشه و المعجون هالنصيحه قالتها لي صديقتي وقالتي لو بعد الفرشه مباشرة ممكن تعورك 😁 

تحطينها و عادي تشربين مويه فقط وانتي حاطتها

الطريقه سهله جدا ما تدوخ 

و بس بعد ساعتين تشيلينها و تفرشين بدون معجون عشان بقايا الجل الي من اللصقه يروح عن اسنانك ❤️ 

خليها نفس الرقت بالضبط لو زدتي وقت بتعورررك 😩 

طبعا زي ماقلت في ناس ماناسبهم هالنوع لانه قوي عالاسنان الحساسة بس انا ضبط معاي 

من اول لصقه اسناني فرق لونها مو بياض لكن لمعه ونظافه 😻

ثاني استعمال اللون فتح 

ثالث استعمال فتححح كثيرررر 😻 

و رابع استعمال سار بياضها حلو و وقفتها 

خبيت الباقي للمناسبات و حطيتها باوقات متفرقه لان ال٣ الاولى استعملتها يوم بعد يوم

و للحين اسناني لونها ابيض جميل مو زي ما بديت استعملها اكيد لكن فرق عن قبل استعمالها 

و استعملت لصقه نوع ثاني الي هي advanced vivid مدتها نص ساعه 

ما استعملت الا وحده قبل فتره و ادتني بياض خفيف ❤️ 

بالنسبه للي يقولو لها اضرار انا قريت و بحثت و سألت دكاتره و اتضح انها تقريبا احسن وسيله للتبييض من ناحيه السعر و الفائده و ان تبييض الليزر يزيل من طبقه المينا و يضر بالاسنان على المدى الطويل لكن اللصقات لا 

اتمنى استفدتوا حبايبي و لا تنسوني من دعمكم و ارائكم 😘💖

استعدادك للسنة الدراسية الجديدة 2 "النظافة الشخصية" - back to school part 2

السلام عليكم جميلاتي ..

 

البوست اليوم بيكون ثاني بوست من سلسلة الرجوع للمدراس و الدوامات

و حتكلم فيه عن النظافة الشخصية ..

 

طبعا انا بتكلم عن نظافة الجسم و العناية بالبشرة  و الشعر

 

~ التدوينة شاملة لجميع الفئات العمرية  ~

 

بسم الله الرحمن الرحيم

طبعا نظافة الجسم شي مهم جدا جدا جدا

 

و العناية الداخلية دايم تنعكس عالمظهر الخارجي

دايم نشوف ناس عاديين بملابسهم و استايلهم لكن يجذبنا اعتنائهم ببشراتهم و اجسامهم

 

تقريبا كلنا نداوم فترات صباحية يعني شمس و حر و رطوبة

مع جونا ماشالله *كملت*

 

 

 

بختصر كلامي بنقاط عشان تكون اسهل للقراءة ~

 

 

 

1- ازاله الشعر من المناطق الحساسة و تحت الابطين

 

2- اختيار مزيل لرائحة العرق خالي من العطور عشان ما تسمر المنطقة و يفضل تجربته مسبقا بالبيت

 

3- الاستحمام يوميا و الاهتمام بترطيب الجسم خصوصا المناطق الجافة مثل الركبة و الكوع و الرجلين

 

4- الاهتمام بتقشير الجسم اسبوعيا او مرة كل اسبوعين

 

5- الاهتمام بنظافة الملابس الداخلية و تغييرها باستمرار

 

6-  عمل ماسكات اسبوعية للشعر و الوجه

 

7- حاولي تخلين لك روتين صباحي غسول وجه و مرطب مرتاحه عليه

 

 

 

 

بعض المنتجات المقترحة :

 

 

لازالة الشعر يفضل نزع الشعر باحدى الطرق المعروفة ( حلاوة - مكينة )

 

مزيل العرق انا شخصيا افضل بيزلاين و سعره بال50

جربت فترة سيباميد كرهته مره و ما انصح احد فيه ابدا ..

 

و سمعت مدح على كوريكشن و ان شالله عن قريب اجربه ..

 

 

 

 

 

 

 

افضل غسول جسم بالنسبة لي ديتول

احسه ينظف من قلب

 

 

 

 

 

منتجات ترطيب الجسم كثيرة

وتنقسم لانواع

 

لوشن : ترطيب خفيف

كريم : ترطيب متوسط

زبدة : ترطيب عميق

 

 

يفضل استعمال الزبدة قبل النوم عشان يمتصها الجسم كويس  و افضل شي بعد الشاور

و اللوشن و الكريم ممكن استعمالها كل صباح لزيادة الترطيب

 

 

لوشنات فازلين جميلة و خفيفة و تؤدي الغرض

 

كريم بيبي جونسون المفضل بالنسبة لي ترطيبه حلو

 

زبدات بودي شوب الافضل بالنسبة للترطيب . كمان زبدة بالمرز بالكاكاو جميلة

 

 

 

 

 

 

مقشرات الجسم انواع واشكال

في منها خشن و في ناعم

 

يمدحون مقشر بودي شوب سبا وزدم

 

مقشرات سانت ايفز للوجه بطططططله

 

و ملح الحليب حلو للجسم  و يدي نعومة

 

 

 

 

 

 

 

ماسكات الشعر و الجسم في خلطات طبيعية و بسيطة و في  جاهزة من الصيدلية او السوبر ماركت

 

 

ماسك لوريال الفايف للشعر جميل

 

حاليا بجرب ماسك من بوتس شكله بيعجبني خخخ

 

و للوجه ماسكات بيزلاين حلوة و نيفيا كمان جميلة

 

 

 

 

 

 

اما الطبيعية يا كثرها .. بحاول انزل بحسابي بانستقرام بعضها و الي مجربتها و احبها  ~

 

 

 

 

 

 

ان شالله البوست الثاني عن الميكب الصباحي و تسريحات بسيطة للداوامات  غدا  ~

 

 

دمتم سالمين ~

استعدادك للسنة الدراسية الجديدة "1" - back to school part 1

السلام عليكم جميعا

قبل لا ابدأ البوست يسعدني جدا قرائتكم لما اكتب و دعمكم حيفرحني أكثر و أكثر

 

بما انو المدارس و الدوامات قربت حبيت اسوي سلسلة من البوستات اتكلم  فيها عن اشياء كثيرة

اول شي حابة اقولكم شي عن نفسي

انا كل سنة دراسية جديدة احس لازم ابداها و انا فررريش

و متحمسة و مغيرة اشياء في حياتي

لا تسألوني ليش لأن عادتي هاذي من الطفولة

زي الي يحبون يبدون رجيمهم السبت انا احب ابدا دوامي و انا كلي حيوية و طاقة

و دايم اجدد اغلب اشيائي مع الدوامات

اقص اصبغ اشتري ميكب و شنط وجزم و ملابس و و و و ....

و بهذي السلسلة رح اتكلم عن اشياء كثير

البارت هذا بيكون عن الاستعداد النفسي

و الجاي بيكون عن الاستعداد الخارجي يعني مظهرك و هيك

و الثالث و الاخير بيكون تجهيزاتي أنا للسنة الجديدة

 

اتمنى تكون هاذي السلسلة مفيدة لكم لاني بيوم من الايام كنت ادخل منتديات و اقعد ادور عن تجهيزات المدراس و تسريحات وكذا ولا اطلع بنتيجه مفيدة غالبا

 

بسم الله نبدا ..

 

 --------------------------------------------------------------------------------

اول شي بتكلم عن المستجدين

سواء في جامعة او في مرحلة دراسية جديدة او دوام جديد

 

انتو محظوظين

أي نعم محظوظين

ليش ؟

لان اتيحت لكم فرصة تغيرون فيها تغيير جذري من نفسكم

برضو ليش ؟

لان حيكون محيط جديد بك

انتو عارفين انو اغلب وقتنا نقضيه بالدوام فيعتبر جزء كبير من حياتنا

حيعطيك حافز اكبر للتغير

غير لما تكونين بنفس المحيط ممكن بعض الناس تخاف من ردات فعل المحيطين و هذا شي غلط

لكنه يحصل

فتغيير المحيط يديك دفعه للتغير الى الافضل سواء من شكلك او من داخلك

و مشاكلك في مرحلتك السابقة انسيها و ابدي صفحة جديدة مع نفسك و تصالحي مع الكون

حاولي تخلين بدايتك صح عشان ترتاحين

 وعاملي الناس بما يرضي الله

احبي لهم ما تحبينه لنفسك

و تذكري قبل الاساءة لاحد ان ممكن ترجعلك و ان هاذي الاساءة لو كانت لك وش بيكون شعورك

و اهم قاعدة حطيها قدامك

ان مافي ولا  شي صعب او مستحيل بالحياة الدنيا  

 

 

اصحاب الدوامات الجديدة

سواء ناقلين او مغيرين المهنة

ان الله يحب اذا عمل احدكم عملا ان يتقنه

اذا كنتم مقصرين سابقا تفانوا اكثر

اذا كانت مهنتك تتطلب تنافس خلو تنافسكم شريف و لا تجعلون منه اساس لعداوات مالها اول ولا تالي

اتقوا الله في كل خطوة من خطوات حياتكم و اذا كنتم متشائمين تفائلوا

اذا نقلتي بمكان ما تحبينه احتسبي الاجر و اصبري و ادعي و الله يغير الحال لأفضل

و انا مالي تجارب مع العمل عموما لكن كنت اشوف اخواتي لما ينقلون من مكان لاخر كيف يتعبون و يشيلون هم المحيط الجديد لكن مع بداية كل سنة يتأقلمون و محيطهم الجديد يكون افضل من سابقه

الله يكتب لنا الخير في كل حياتنا

 

بنات المتوسط الي داخلين ثنوي

ببداية الامر رح تحسون انكم كبار و فاهمين

بس مع الايام رح تستوعبون ان الموضوع عادي و طبيعي

اختياركم ما بين علمي و ادبي منوط بميولكم

تحبين الفهم و تشغيل المخ و عالم الارقام ادخلي علمي

تحبين تعرفين معلومات تهمك و شي واقعي و تحبين الحفظ ادخلي ادبي

ابدا ماله دخل بانك ذكية او غبية

ولا له دخل بانك شاطرة و كسلانة

ياما بنات كنت اشوفهم بالثنوي شطار و دخلو علمي و ظلمو نفسهم و نزل مستواهم

لان هالشي ما كان مناسبهم

انا بالثنوي دخلت علمي لاني احب اشغل مخي و افكر و كيف جاه الشي و ليش

صح تعبت بالمذاكرة لاني كنت احب العب و اعتمد على ذاكرتي و فهمي

لكن الحمدلله

تخرجت بمعدل خلاني اقدر ادخل الجامعة بسلام

و بالنسبة لثالث ثنوي الله يعينكم رح تكون احلى سنة لكم و بنفس الوقت لازم لازم تشدون حيلكم

لانها سنة مصيرية

حتتعبون شوي بسبب التحصيلي و القدرات

لكن ترا القدرات شي جميل و سهل و انا عن نفسي دخلته بدون مذاكرة وجبت درجات حلوة

لكن التحصيلي كنت علمي و المعلومات كلها درسناها لكن زي ما قلت اعتمدت على فهمي بس درجتي ما كانت شينة

و حطو ببالكم

حتى لو ما حققتو الي تبونه بالثنوي رح تحققونه بعدها

لان الحياة لسى قدامكم ان شالله

و ماتوقف الحياة على معدل او نسبة

ناس تخرجوا بنسب واطية و الان وصلوا لاحلامهم و من احسن الناس

نفسك تدخلين الجامعة

ما قبلوك

قدمي عن بعد او انتساب و الافضل بالنسبة لي عن بعد لانك حتكسبي 30 درجة مضمونة

لكن الانتساب 100 درجة كلها اختبار

هذا بالنسبة لجامعة الملك عبدالعزيز بجدة ..

ما حبيتي تدرسي وانتي بالبيت عندك خيارات كثير

تقدري تقدمي عالمنح الداخليه و تدرسي بجامعة اهليه على حساب الحكومة او ممكن تسجلي بنفسك على حسابك لكن لو على برنامج المنح لازم تتوفر الشروط

ما حبيتي الجامعات الاهلية

عندك معاهد

المعهد التقني حكومي و فيه تجميل و ازياء و يدوك مكافأة بعد

فيه معاهد اهليه مالية البلد

ماحبيتي تدرسي بعد الثنوي على طول خذي بريك سنة

ادخلي نادي اتدربي على شي مفيد

رسم تصميم تصوير ميكب أي شي انتي حابة

و لو طموحك كبير ابدأي بزنس خاص فيك

الدنيا ابدا ماتوقف على شي

يقفل باب يفتح بداله عشرة

 

 

 

المستجدين في الجامعات

حتكون سنة جميلة ان شالله

اختلاف كبير حيكون من ناحية الانظمة و المكان و المحيط عموما

لكنه اختلاف للافضل

حتنبسطو

اغلب الاشياء الممنوعة في المدرسة مسموح فيها بالجامعات

ممكن تكون اول سنة متعبة بالبداية من ناحية الدراسة

لكن على نص الترم بتتعودون و تحبون حياتكم الجديدة

 

 

تجربتي مع اول سنة جامعية

بالنسبة لجامعة عزوز جامعتي

اول سنة كانت سنة حلوة

اتعرفت على بنات كويسين و صرنا صديقات

بالبداية كنت اتوه بين المباني لكن بديت اركز على المباني الي فيها كلاساتي و تدريجيا عرفت كل مباني الجامعة

المباني بعيدة عن بعض شوي

لكن في قولف كار توصلكم من مكان للثاني

طبعا هي مو تاكسي تاشريلها و توقف _زي ما بداية السنة في الجامعة كنت اسوي _

لها مواقف خاصه توقف فيها احفظيها و اول ما توقف اركبي و ما انصحكم تستنوها كثير لان مداكم وصلتو مشواركم وهي ما جات

الاستاذات بالسنة التحضيرية كانوا طبيعين عاديين ما يخوفون

ولان ما بيدها درجات لا تخافي تاخذي و تدي معاها

لكن اكيد في حدود الادب لان في شي اسمه مجلس تأديبي له عقوبات

الاختبارات كانت حلوة و سهله عكس الثنوي

المباني بعضها تكييفها بارد جدا و الاخرى حارة جدا

عشان كذا صار جكيتي بالشنطة متى ما بردت طلعته

الكافتريات كانت تنقسم لانواع

في شي اسمو رابيس و مكانه جوا مبنى العلوم رقم 7 و امام مبنى 460 و بين مبنى الخنساء و البتول و غيرها كثير

و في الاستراحات رقم 18 فيها كافيه جوفريز و مطعم بنيننوس و ماريا دايت سنتر او شي زي كذا اسمو لان كل سنة يغيرون الاسم و في ركن بودي شوب صغير و جميل دايم امره

و في الاستراحه الي يسار بوابة شمالية 1 و انتي داخله

هاذي افضلهم من ناحية الاكل و قبالها كافتريا صغيره تبيع سندوتشات البيك بعد 11 خخخخ

و في كافتريا داخل مبنى الحاسب و قدامو و هاذي المباني بعد 460

يعني في اخر الجامعة تقريبا

عندكم عمادة القبول و التسجيل و عمادة الشؤون

غالبا بالسنة التحضيرية ما تحتاجين الا شؤون الطلاب و مبناهم قبال 460

انظمة جامعتي حلوة

تسمح بجوال الكاميرا

تسمح بالبنطلون مع بلوزة طويلة و الليقينز ممنوع بس احيانا يمشوها لك

طبعا اذا مسكوك الشؤون بلبس مخالف تنسحب بطاقتك وماتاخذينها الا بعد الساعه 10 من المبنى حقهم  واحيانا بس يسجلون اسمك

الي كان قاهرني ان الشؤون مالهم لبس معين

يعني فجاه تلاقين حرمة ساحبة بطاقتك تقول انها شؤون

فكنا نتجنب المخالفات

لان بعد 5 مخالفات تنسحب بطاقتك لمدة طويلة و مجلس تأديبي و شغلة

كنا نريح اعمارنا و نقعد بالعباية اريح

تعامل الشؤون كان سيء سيء سيء

الا من رحم ربي

لكن هذا كان اكثر شي مضايقني و ما زال

كانهم مغصوبين يخدمونك بينما هاذي شغلتهم و محاسبين عليها

 

عموما اغلب الي بالجامعة كذا للاسف لذلك حاولو ما تنصدمون

 

 

 

 

 

 

 

هذا كان كل شي لبوست اليوم

قرقرت كثير

لكن اتمنى اكون افدتكم و لو بشي بسيط

ان شالله البوستات الجايه بتكون مفيدة اكثر لاني اعرف انها مطلوبة اكثر

 

و كل سنة و انتم طيبين